引用:
原帖由 夜遊 於 10-3-2010 04:47 PM 發表 
應該咁講, 利記既情, 真係比好多球隊既領導層多好多
以前我都講左禾夫斯堡, 咁既 budget 教左個 title 番黎
title 喎
今季九場不勝, 都係要炒
得閒睇返些少舊post
見你講起禾夫斯堡贏冠軍
我就好有興趣同大家分享些少資料
現今主要歐洲聯賽，到底有幾多隊
真係可以以弱勝強，可以用蔗渣既價錢去贏「冠軍」？
呢樣野我好有興趣，所以去搵搵資料
不過
要講一講禾夫斯堡教練先，呢度有些少資料錯誤
上季帶領禾夫斯堡贏得德甲冠軍既教練係「馬加夫」
贏冠軍之前就已經確定轉會史浩克，之後禾夫斯堡就奪冠
今季禾夫斯堡由「Armin Veh」上任，季中成績不佳被炒，由青年軍教頭「哥斯達」上任
所以今季教練已經唔同左，被炒的並不是同一人，「馬加夫」沒有被炒
係理論基礎方面，我係以結果論，純粹以「冠軍」計算，因為係唔會有人記得「第二名」的
而且係會以五年為分配點，因為歐洲足協聯賽系數係以五年來計分，而且五年前既轉會市場無而家咁泡沫、經營開支情況都無而家咁複雜，加上通貨膨脹既考慮
歐洲主要聯賽五年內既聯賽冠軍：
英超：車路士、曼聯
西甲：巴塞、皇馬
意甲：國際米蘭
德甲：拜仁、史特加、禾夫斯堡
法甲：里昂、波爾多
車路士、曼聯
兩隊點都無可能係蔗渣價錢
雖然曼聯有負債，但要錢的時候，從來都唔會缺錢
車路士有阿布既財力支援
巴塞、皇馬
兩隊都係傳統豪門，巴塞雖有拉馬西亞青訓作後援，但買人一向都唔會慳，今季買一個坐多過踢既卡路華斯基都要二千萬歐元
皇馬我相信唔使講，完
國際
有莫拉提近乎無限既財務支援，完。
可以見到英、意、西三大聯賽近五年聯賽冠軍都唔係用蔗渣既價錢去贏「冠軍」的
之後係德甲
拜仁、史特加、禾夫斯堡
拜仁向來財政健康，但從來都唔會使大錢，有錢都唔會亂使
但自從前年一口氣買入高路斯、東尼、列貝利後，之後就高美斯、洛賓
拜仁都向現實低頭，有錢都要使了，唔慳得
禾夫斯堡就要用比較多既資料去解釋了
禾夫斯堡其實以資本計，係德甲最富有既球會
作為大眾汽車既附屬機構，每年禾夫斯堡從大眾汽車得到既資助係三千五百萬歐元，係拜仁既三倍
而奪冠骨幹
加菲迪（８００萬）、迪斯高（４００萬）、根拿（５００萬）、米斯莫域（５００萬）、祖斯（７００萬）、巴沙利（１４００萬）、斯蒙歷（５００萬）
加加埋埋係差唔多係一年半內用左五千萬歐元的，今季都用差唔二千萬買入馬田斯同Réver
禾夫斯堡絕對唔係蔗渣既價錢，反而係大眾汽車既燒錢工具。
法甲
里昂七連勝，其實除左奧拉斯集團既財力支援外，更加係法甲最賺錢既球會，而且就連里昂既建設都係有市政府既支援，新球場、新訓練基地都係市政府有份注資的。
當中我有兩隊係無提的，分別係史特加、波爾多
呢兩隊係唔係可以唔使點用錢而有冠軍既球隊呢？
波爾多上季打破里昂奪冠，只係借一人，買一個人
波爾多一向行一年一星既習慣，集中資源去一個目標度，再配合巴西幫、青訓
今季買哥古夫就用左１５００萬歐元
上季前買卡雲拿基係１１００萬歐元
前季買迪亞拉８００萬歐元
當中包括２００９年買卡里素都用左７００萬的
考慮到法甲市場並不泡沫，國內轉會１０００萬已經係天價既情況下
波爾多係唔係蔗渣既價錢呢？我覺得真係見人見智（我認為唔係）
最後就得史特加，真係唯一一隊唔使點用錢既冠軍
以青訓為主力，希迪布籣、泰斯、高美斯、卡利哈、比亞富卡等等，卡卡奧、麥林、柏度等外援都係唔使好多錢的
係當年德甲亂局中殺出重圍，最後一週反壓史浩克奪冠（我好記得，因為當年我係澳門睇ｃｃｔｖ睇住的）
係近五年內唯一唔使點用錢既冠軍，而當年既教練，就係今季俾禾夫斯堡炒左既「Armin Veh」
之後我想大家睇下聯賽系數，英超、西甲帶離其他聯賽，分別係７５．７４９同７５．１６６，之後係意甲係６０．４１
英超、西甲大大帶離其他聯賽，而法甲５２．６６８，德甲４８．７２２，相差左差唔多二十分的
以聯賽系數係準則
可以話英超、西甲、意甲，係水準較高的三大聯賽
法甲、德甲分別係四、五
原來，頭四個聯賽近五年，都係未出現過可以以弱勝強，可以用蔗渣既價錢去贏「冠軍」的
德甲就曾經三年前出現過一次，不過德甲係五個聯賽水準系數係最低的
「以弱勝強，可以用蔗渣既價錢去贏冠軍，係頂班聯賽，原來係一個近年都未實現過的幻想」
